ស្លាប់ និងរបួស១០​នាក់ ធ្លាក់យន្តហោះ​ភាគខាងត្បូង​ម៉ិកស៊ិក

អន្តរជាតិ: ប្រភពព័ត៌មាន Sputnik នៅថ្ងៃទី២២ ខែមីនា ឆ្នាំ២០២០ បានផ្សាយថា ​មនុស្ស​ម្នាក់បានស្លាប់ និង៩នាក់ផ្សេងទៀត​​រងរបួស​ ដោយសារហេតុការណ៍​ធ្លាក់យន្តហោះ​មួយគ្រឿង​នៅភាគខាងត្បូង​របស់ប្រទេសម៉ិកស៊ិក ។

 ប្រភពអះអាងថា ឧទ្ធម្ភាគចក្រ Black Hawk បានធ្លាក់​នៅក្នុងរដ្ឋ Veracruz ភាគខាងត្បូង​របស់ប្រទេសម៉ិកស៊ិក ។ អគ្គលេខាធិការ​កងកម្លាំងជើងទឹក​ម៉ិកស៊ិក (SEMAR)​បានថ្លែងថា មនុស្ស​ម្នាក់​បានស្លាប់ និង​៩នាក់ផ្សេងទៀត​រងរបួស ។  នៅលើគណនីទំនាក់ទំនងសង្គមផ្លូវការរបស់ SEMAR បានបញ្ជាក់ថា «នេះសូមជូនព័ត៌មានថា ជាអកុសល ឧទ្ធម្ភាគចក្រ Black Hawk មួយគ្រឿង​បានធ្លាក់​​នៅតំបន់ Tepecuitlapa ទីក្រុងTehuipango រដ្ឋ Veracruz របស់ប្រទេសម៉ិកស៊ិក ។ នេះជាព័ត៌មានបឋម»។

 លោក Cuitlahuac Jimenez អភិបាលរដ្ឋ Veracruz បានបញ្ជាក់ថា ឧទ្ធម្ភាគចក្រ​ដឹកមនុស្ស​១០នាក់ ហើយក្នុងនោះម្នាក់បានស្លាប់ បន្ទាប់ពីហេតុការណ៍ធ្លាក់​នេះ ។ លោកអះអាងថា យន្តហោះនេះ​កំពុងហោះហើរ​ធ្វើប្រតិបត្តិការសង្គ្រោះជនរងគ្រោះ​ក្នុងអំពើ​ចាប់ជំរិត​ស្ថិតនៅក្នុងតំបន់ Zongolica ភាគខាងត្បូង​នៃរដ្ឋ Vercacruz ។ មូលហេតុធ្លាក់​ឧទ្ធម្ភាគចក្រនេះ មិនទាន់ដឹងនៅឡើយទេ ។ ប្រតិបត្តិការជួយសង្គ្រោះ​កំពុងដំណើរការ​នៅកន្លែងកើហេតុ ។ នេះបើតាមរដ្ឋមន្ត្រីក្រសួង​ការពារជនស៊ីវិលម៉ិកស៊ិក Hugo Gutierrez ។ អ្នករងរបួស​កំពុងត្រូវបានជួយសង្គ្រោះភ្លាមៗ ៕